14. august 2000 EM 2000/10
Nalinginnaasumik oqaaseqaatit
Naalakkersuinikkut sulinermut aningaasatigut tapiissuteqartarneq pillugu Inatsisartut inatsisaat naalakkersuinikkut suliniaqatigiiffiit Inatsisartuni sinniisuutitaqartut, Inatsisartunut ilaasortat partiit avataanni qinigaasut aamma Inatsisartunut ilaasortat arlaqartut kattusseqatigiinnut qinigaasut naalakkersuinikkut sulinerminni aningaasatigut tapiiffigineqarnissaannut periarfissiivoq.
Naalakkersuinikkut sulinermut aningaasatigut tapiissuteqarneq pillugu Inatsisartut inatsisaat Inatsisartunut ilaasortanut, partiimut kattusseqatigiinnulluunniit qinigaasimasunut, partiimut kingusinnerusukkut ilaasortaajunnaarsimasunut imaluunniit kattusseqatigiinnut suleqataajunnaarsimasunut aningaasatigut tapiiffigineqarnissamut periarfissiinngilaq.
Taamatut allannguuteqartitsinissamik siunnersuummi Inatsisartunut ilaasortanut partiimut kattusseqatigiinnulluunniit qinigaasimasunut, partiimut kingusinnerusukkut ilaasortaajunnaarsimasunut kattusseqatigiinnulluunniit suleqataajunnaarsimasunut aningaasatigut tapiissuteqartarnissamut tunngavissiisoqarpoq.
Allannguutissatut siunnersuutip ilusilersornerani Inatsisartunut ilaasortat ataasiakkaat mianerinissaat, partiiit aaqqissuussaanerisa mianerinissaat minnerunngitsumillu Inatsisartuni sulinerup mianerinissaa aalajangiusimaniarneqarsimapput.
Inatsisartunut ilaasortat allannguutissatut siunnersuummi matumani pineqartut naalakkersuinikkut sulineranni aningaasatigut tapiissutaasartut qaffasissusissaat, aningaasatigut eqqarsaatersuutinik patsiseqartumik partiimit kattusseqatigiinnilluunniit tunuarnissamut kajumilersitsinissaq pinaveersaarlugu aalajangiivigineqarsimapput. Qaffasissusissaasa aalajangerneranni aammattaaq naleqqiunneqarsimapput partiinut aamma kattusseqatigiinnut aningaasatigut tapiissutaasartut agguaqatigiissillugu qaffasissusiat (Inatsisartunut ilaasortamut ataatsimut tapiissutit).
Siunnersuutigineqarpoq aalajangersimasumik tapiissutaasartut 210.000,00 kr.-it tunniunneqartarnerat allanngortinneqassanngitsoq. Naliliivigineqarpoq, aalajangersimasumik tapiissutaasartut tunniunneqartarneranni, partiip, kattusseqatigiit inuulluunniit ataatsip qinigassanngortittup Inatsisartuni sinniisuutitaqalernissartik namminneerlutik tunngavissiinermikkut angusimaneraat suli tunngavigineqassasoq. 1999-imi qinersinermi piumasarineqarpoq Inatsisartunut qinigaassagaanni agguaqatigiissillugu 908-nit taaneqarsimasariaqartoq.
Partiit kattusseqatigiillu naalakkersuinikkut sulinerminni 1. januar 2000-imi ukiumut 2000-imut imatut tapiiffigineqarsimapput:
Tapiissutit Inatsisartunut ilaasortat Ilaasortamut ataatsimut tapiissut Atassut 636000
8
79500
IA 583020
7
83289
Siumut 803940
11
73085
Kattusseqatigiit 417180
4
104295
Qinigassanngortittoq partiimut kattusseqatigiinnulluunniit Inatsisartunut qinersinermi qinigassanngortippat tamanna taakkununnga tamanut pitsaaqutissartaqarpoq. Partiip kattusseqatigiilluunniit aamma Inatsisartunut ilaasortatut tunuartup akornanni aningaasat tungaasigut pitsaaqutit isumatuumik agguataarnissaat ajornarpoq.
Partiinut, kattusseqatigiinnut inunnullu ataasiakkaanut qinigassanngortittunut naalakkersuinikkut sulinermut tapiissuteqartarneq pillugu Inatsisartut inatsisaat naapertorlugu tapiissutit naatsorsorneqartarput Inatsisartunut kingullermik qinersisoqarnerani taasinerit pissarsiarisimasat tunngavigalugit. Tapiissutit naatsorsorneqartarput piffissamut qinigaaffimmut tamarmut.
Allannguutissatut siunnersuummi periaaseq taanna allanngortinneqanngilaq. Taamaattumik partiinut kattusseqatigiinnulluunniit aningaasatigut tapiissutit ikileriaateqassanngillat Inatsisartunut ilaasortap partiimit kattusseqatigiinnilluunniit aninerani. Illuatungaatigulli aamma partiimut kattusseqatigiinnulluunniit aningaasatigut tapiissutit amerleriassanngillat Inatsisartunut ilaasortap partiimut kattusseqatigiinnulluunniit ilaasortanngornerani.
Aningaasatigut allaffissornikkullu sunniutissai:Qaqutigoortuuvoq Inatsisartunut ilaasortap partiimut kattusseqatigiinnulluunniit qinigaasup partiimit kattusseqatigiinnilluunniit kingusinnerusukkut tunuartarnera. Ilimagineqanngilaq allannguutissatut siunnersuut Inatsisartunut ilaasortat attaviitsunngortut amerlassusiannut sunniuteqassasoq.
Naalakkersuinikkut sulinermut aningaasatigut tapiiffigineqarnissamik qinnuteqaatit ataatsimik marlunnilluunniit amerleriarnissaat allaffissornikkut sulinermut annerusumik malunniuteqartussaanngilaq.
Allannguutissatut siunnersuutip naalakkersuinikkut sulinermut tapiissutit annikitsumik amerleriarnerat kingunerissavaa. Parlamentariskiusumik ullumikkut pissutsit eqqarsaatigalugit taamaallaat Inatsisartuni ilaasortap ataatsip allannguutissatut siunnersuut naapertorlugu tapiiffigineqarnissamut piumasaqaatit eqqortippai. Tapiiffigineqarnissamik qinnuteqartoqassappat taava tamatuma kingunerissavaa aningaasartuutit 50.000,00 kr.-inik qaffariarnerat.
Tusarniaaneq:Inatsisileriffik kisimi allannguutissatut siunnersuut pillugu tusarniaavigineqarsimavoq. Inatsisileriffik siunnersuut pillugu immikkut oqaaseqaateqanngilaq.
Siunnersuummi aalajangersakkanut ataasiakkaanut nassuiaatit.
§ 1-imut
Nr. 1-imut
Tassani pineqarpoq allannguutissatut siunnersuutip sunniutissai pissutigalugit naqqiut, tassa taanna malillugu aammattaaq Inatsisartunut ilaasortat partiimut kattusseqatigiinnulluunniit qinerneqarsimasut, partiimit kattusseqatigiinnilluunniit tunuartut siunissami aningaasatigut tapiiffigineqarnissamut periarfissaqalissammata.
Nr. 2-mut
Allannguutissatut siunnersuummi atorneqarpoq oqariartaaseq "tunuarneq", taanna Inatsisartuni ilaasortap partiimi ilaasortaajunnaarneranut kattusseqatigiinniluunniit suleqataajunnaarneranut nalinginnaasumik taaguutitut atorneqarluni. Inatsisartuni ilaasortap allannguutissatut siunnersuut naapertorlugu aningaasanik tapiiffigineqarsinnaaneranut aalajangiisuussaaq pineqartoq partiimi Inatsisartuni sinniisuutitaqartumi ilaasortaajunnaarnersoq kattusseqatigiinniluunniit Inatsisartuni sinniisuutitaqartuni suleqataajunnaarnersoq. Taamatut attaveqarunnaarneranut suna patsisaanersoq apeqqutaanngilaq. Taamaalilluni apeqqutaanngilaq Inatsisartuni ilaasortaq partiimi ilaasortaanerminit soraarsitaasimanersoq imaluunniit nammineq piumassutsiminik ilaasortaajunnaarsimanersoq taamatullu aamma apeqqutaanani, kattusseqatigiinnik suleqateqarneq kimit atorunnaarsinneqarsimanersoq.Aalajangersakkami allaaserineqarpoq attaviitsut Inatsisartuni naalakkersuinikkut sulinermut tapiiffigineqarsinnaassappata suut piumasaqaataanersut. Aalajangersagaq taanna malillugu aningaasanik tapiiffigineqarnissamik qinnuteqaatip nassiunnerani naalakkersuinikkut partiimut ilaasortaajunnaarnermut imaluunniit kattusseqatigiinnut suleqataajunnaarnermut uppernarsaatissaqartariaqarpoq.
Aningaasatigut tapiiffigineqarsinnaaneq atuutilersarpoq qaammatip, ilaasortap partiimit kattusseqatigiinnilluunniit tunuarfiata naanerani. Tapiiffigineqarsinnaassagaanni qinnuteqaqqaartariaqarpoq. Qinnuteqaat Naalakkersuisunut nassiunneqassaaq partiimit kattusseqatigiinnilluunniit tunuarnermiit kingusinnerpaamik qaammatit marluk qaangiunneranni. Aatsaat immikkorluinnaq ittumik pisoqartillugu tapiiffigineqarnissamik qinnuteqaatip qaammatinut marlunnut piffissaliussap qaangiunnerani tunniunneqarnera akuersaarneqarsinnaassaaq.
Partiinut kattusseqatigiinnullu aamma ilaasortanut partiit avataanni qinigaasunut tapiissutit naatsorsorneqartarnerattulli siunnersuutigineqassaaq, tapiissut Inatsisartunut ilaasortap Inatsisartunut kingullermik qinersisoqarnerani taasinernut ataasiakkaanut pissarsiarisimasaanut tamanut 60 kr.-iussasoq. Aamma siunnersuutigineqarpoq, Inatsisartuni sulinermut aningaasatigut tapiissutit ikinnerpaaffissalerneqassasut. Partiinut kattusseqatigiinnullu aningaasatigut tapiissutaasartut agguaqatigiissillugu angissusiat eqqarsaatigalugu siunnersuutigineqarsimavoq, tapiissutit ikinnerpaaffissaat 50.000,00 kr.-inut aalajangerneqassasoq.
Ukiumi qinnuteqarfiusussami tapiissuteqartoqartassaaq ukiumut tapiissutit annertussusissaannut naleqqiullugu annertussusilikkanik. Inatsisartunut ilaasortaq partiimut kattusseqatigiinnulluunnit ilaasortaajunnaarsimappat junip qaammataani, taava aningaasatigut tapiissuteqartoqartarsinnaassaaq ukiumi pineqartumi julip qaammataa aallarnerfigalugu taavalu decemberip qaammataa ilanngullugu.
Inatsisartunut ilaasortaq partiimut kattusseqatigiinnulluunniit Inatsisartuni sinniisuutitaqartunut ilaasortanngorpat, taava tapiissutit atorunnaassapput. Taamaalilluni Inatsisartunut ilaasortaq innersuunneqartussaassaaq partiimit pineqartumit kattusseqatigiilluunniit pineqartunit naalakkersuinikkut sulinermini ikiorsiivigineqarnissaminut periarfissaannut.
Inatsimmi aalajangersakkat allat naapertorlugit aningaasatigut tapiissuteqartarneq assigalugu tapiissuteqartoqartassaaq ukiup Inatsisartunut tullianik qinersisoqarfiup naaneranut. Ukiut tamaasa nutaamik qinnuteqartoqartassanngilaq. Taamaattoq ilumoorluinnarluni uppernarsaalluni nalunaartoqartassaaq aningaasatigut tapiissutit sumut atorneqarnersut.
Nr. 3-mut
Allannguutissatut siunnersuutip kingunerissavaa, qinnuteqartoqarsinnaassammat kikkunnulluunniit naalakkersuinikkut sulinermut aningaasatigut tapiissuteqartarneq pillugu Inatsisartut inatsisaat naapertorlugu aningaasatigut tapiiffigineqarnissamik kissaateqartunut.
Nr. 4-mut
Allannguutissatut siunnersuutip kingunerissavaa, aningaasatigut tapiissutinik pissarsisut nalunaartassammata, tapiissutit Inatsisartuni naalakkersuinikkut sulinermut atorneqartut.
§ 2-mut.Siunnersuutigineqarpoq, allannguutissatut siunnersuut atortuulersinneqassasoq 1. december 2000. Aamma siunnersuutigineqarpoq, allannguutissatut siunnersuut atuutilissasoq 1. januar 2000-imiit.
Inatsisartunut ilaasortat partiimit kattusseqatigiinnilluunniit piffissami 1. januarimiit allannguutissatut siunnersuutip atortuulersinneqarnerata tungaanut tunuartut kingumoortumik tapiiffigineqarsinnaassapput. Taamaalilluni Inatsisartunut ilaasortaq partiimit kattusseqatigiinnilluunniit februarip qaammataani tunuartoq tapiiffigineqarsinnaassaaq 2000-imi martsip qaammataa aallarnerfigalugu taavalu decemberip qaammataa ilanngullugu.
Qinnuteqaat Naalakkersuisunut nassiunneqassaaq allannguutissatut siunnersuutip atortuulersinneqarneraniit kingusinnerpaamik qaammatit marluk qaangiunneranni. Aatsaat immikkorluinnaq ittumik pisoqartillugu tapiiffigineqarnissamik qinnuteqaatip qaammatinut marlunnut piffissaliussap qaangiunnerani tunniunneqarnera akuersaarneqarsinnaassaaq.